File:2023-03-23 Laleno.jpg

Tetun: Primeiru-Ministru Taur Matan Ruak lansa fatuk dahuluk ba konstrusaun Torre RTTL iha Altu Lalenu-Lautem

Lautem, loron 23 fulan-marsu, tinan 2023 – Sua Eselénsia Primeiru-Ministru Taur Matan Ruak akompaña husi Ministru bá Asuntu Parlamentar no Komunikasaun Sosiál (MAPKOMS) Francisco Martins da Costa Pereira Jerónimo, kinta ne’e, lansa fatuk dahuluk simbolikamente ba projetu konstrusaun tore tranzmisaun tolu Rádiu Televizaun Timor-Leste foho Alto Lalenu, Maina II, Munisípiu Lautem, ne’ebé sei inklui mós ida iha Fleicha, Ainaro Oepo, Tapo Tas, Bobonaro, nu’udar parte programa dijitalizasaun RTTL no haluhan kobertura Rádiu Televizaun Timor-Leste nian. Hafoin lansamentu, iha intervensaun, Xefe Governu projetu ne’e importante tebes ba Rádiu Televizaun Timor-Leste Empreza Públika ne’ebé atualmente foin kobre de’it kobertura de’it 50 % iha teritóriu nasionál, halo povu menus informasaun kona-ba dezenvolvimentu ne’ebé la’o iha rai laran no fasil monu ba informasaun no propaganda falsu sira ne’ebé ema lansa. “Ohin ita halo lansamentu fatuk dahuluk ba harii tore tolu iha Timor laran, ida Lalenu, no ida seluk iha Fleicha-Ainaro no ida fali iha Bobonaro, ne’e tanba saida? Ne’e tanba dadaun ne’e ita nia rádiu no televizaun (RTTL) nia kobertura menus iha ita nia rain 50%, ne’e katak populasaun liu 50% mak la haree televizaun Timor, i haree fali sinetron Indonézia nian karik, tanba la haree ita-nia televizaun, la hatene saida mak la’o iha ita-nia rain, i tanba la hatene fasil liu ema lori informasaun bosok, propaganda falsu mai perturba ita-boot sira, entaun ne’e importante tanba ne’e primeira faze halo lansamentu tolu ne’e, segundu faze sei iha tan, ita hakarak Rádiu Televizaun Timor Lorosae bele kobre ita-nia teritóriu Timor laran tomak para ké informasaun sira sai iha Dili hotu-hotu hatene ida ne’ebé sai husi Lospalos, Suai, Maliana, Oekúsi bele hetan ou Timor laran tomak bele hetan informasaun ne’ebé di’ak nomos ida ladi’ak kona-ba ita nia Nasaun nian tanba ne’e ha’u kontente loos hakarak parabeniza TVTL em espesial ba Sr. Ministru MAPKOMS no Sekretariu Estadu Komunikasaun Sosiál ba ita-boot na’in rua no staff sira hotu serbisu no badianas bele halo ita-nia mehi sai realidade ida”, dehan Xefe Governu iha nia intervensaun. Xefe Governu mós la haluhan agradese ba komunidade sira ne’ebé oferese sira nia rai hodi instala tore tranzmisaun RTTL nian, no husu atu kolabora ho Kompañia implementador hodi bele projetu ne’e la’os susesu. Aleinde ne’e agrade mós ba Autoridade Munisípiu, Postu Lautem no Suku ba kooperasaun di’ak.

Hola parte mós iha lansamentu refere, Vise-Ministru José Edmundo Caetano, Sekretáriu Estadu Komunikasaun Sosiál, Mércio Juvinal do Reis ‘AKARA’,Prezidente Autoridade Munisípiu Ermera, Administradór Munisípiu Ainaro, Autoridade Munisípiu Lautem no komunidade no autoridade lokal sira.HOTU