File:BnF ms. 22543 fol. 8v.jpg

  Cominal vielh, flac, plaides,
  paubre d’aver et escas,
  tan faitz malvatz sirventes
  que del respondre soi las.
  Si’l vostra cavalaria
  venra tota a un dia,
  can er so denan detras:
  l’avols bos e·l bos malvas.
   
  Anc un bo mot no fezes
  no·n i agues dos malvas,
  per que·us tolrai vostre ses:
  mon chan, ab que·us formias.
  Car cantas ab vilania,
  e·l contessa me·n chastia
  que ten Lombers e Burlas,
  que ditz que vos rebusas.
   
  Qui·us tolia Vivares,
  Largentieira e·l Solas,
  on lor, com tamans, orbes,
  mesures vos hom lo vas;
  que cant Pons Tortz vos paissia
  e San Laurens, que·us vestia,
  sias mot paubres e ras,
  que sie·us es anquar, sie·us plas.
   
  Anc sagramen non tengues
  del Tornel, can l’avias,
  ni nullz tems ver no disses
  si mentir non cudavas;
  et anatz queren tot dia
  qu’om se fi: e per maistria
  tenetz lo taulier e·ls das,
  e del joc sabetz assas.
   
  Et aves tans mals apres
  aras e d’aissi en tras,
  que no sai com vos tolgues
  si·l pe no·us toli’o·l nas,
  o·ls oills o no·us aussizia.
  Si no fos la confrairia
  de Chassier e de Carlas
  ab los pecols anaras.

  Cominal, en rima clausa,
  on ja no·m respondres, so cug,
  farai sirventes aora
  e dirai vostra semblansa,
  c’ab armas es soven vencutz;
  et hom vielhs, pos definella
  ni es de totz pretz abatutz,
  be·m meravilh com si fenh drutz.
   
  Be·us n’endrues per la rausa,
  mas qui torn’a maizo non fug;
  mot lai issis en malora,
  c’a pauc Apchiers no·us fo Fransa,
  on parlen aisi com porcs rutz.
  Premiers comtes la novella:
  ses colp encaussatz e vencutz,
  e fo ben messatgiers crezutz.
   
  Nulhs ordes ab vos non pausa,
  pero si·s defendeson tug,
  ja negus dans non lur fora;
  que las gleisas en cozansa
  raubes, e s’anc monges tondutz
  preiet Dieu dins sa capella
  que·l demostres de vos vertutz,
  aras i es ben avengutz.
   
  Nulhs hom c’ab vos an non ausa
  far tornas, mas ades se·n fug
  pel mal qu’el pobles vos ora.
  E cant prendetz vostra lansa
  es tres, vos et ill e·l escutz,
  e catre ab un’avol sella,
  ab no sai cans arquers menutz
  ab rossins magres mal pazutz.
   
  Pus fezes la laida causa
  on mant home foron destrug,
  anc puois Dieus tart ni ab ora
  non cre volgues vostr’onransa,
  ans n’es de pretz decazegutz;
  qu’a Roma ac carta novella
  de mil brullatz, part los pendutz,
  e de mais dez monges barbutz.
   
  Pos los paubres de Castella
  raubes dels motonetz velutz;
  ara·us vau als pecaitz menutz!